شمروخ الأراجوز 2
شكشكة شعرية غير دورية بالفصحى بالعامية
يا ليلة العيد أنستينا
قطر الصعيد انتحر ماهز قلب الحكومة
داب الحديد انقهر وضميرها واكلاه بارومة
ولا خمسة يونية جديد والخلق رايحين فى نومة
إيه جاى تعمل يا عيد كفاياك هزايم مشومة
شاب الغراب والوليد ولا باينه يا مصر قومة
حكم الخدم والعبيد قطع خلفها – يا ثومة
*********************
انت فين يا مبدع اللحن القديم ؟
ليه رقصت نخاسة
فى سيرك السياسة ؟
كنت حاصرنى على صراط مستقيم
وانت متوضى
من إبريق النجاسة


الخبرة عبرة يا عدوية
خمسين سنة واحنا فى ضيقة
قلبتم الكدبة حقيقة
يبليكو ربنما برحيقة .. يا عرة الدرجة الأولى
*
دوستوا المدينة دبحتوا الريف
بعتوا حلاوة الروح برغيف
يركب دماغنا ابو العريف .. ويبعيع شرفها بكوكاكولا
*
يقنعنا إننا أجدع ناس
ما دام نبطل وجع الرأس
فى الدورى ونشد الأنفاس .. نلقى المشاكل محلولة
مع إنه كحلها ..عماها
وبلاها بالذى أفساها
بالغصب نشرب بلواها .. فى القطر زى اللسكولة
*
ضحايا مندورين للموت
هفايا للغبى والعكروت
.. من ألف نكسة نموت ويفوت .. يقش بالغش البولة
*
ونبات له مزنوقين فى اليك
عماكم رقابنا قانون العك
.. وسط الوطن م القهر انفك .. ورجله م الخوف مشلولة
سيرتنا صبحت زى الطين
*


خيبتنا حملين فوق جملين
ومنين ح نهرب منها لفين
والخلق من فاهمة الفولة
كتمنا حتى اتفرقعنا
هتفنا للى مجوعنا
نزك خطوة يرجعنا
رضعنا من لبن الفولة
ودمنا أصبح مية
شهداءنا فدا للحرامية
وعبره لأحمد عدوية
.. شعبان هبالته مقبولة
------------------
حكمة شبه شعبية
بقت الإهانة
فطور السادة وصيامهم
ما دام هو الذل
طفى جمر أحلامهم
رباعية وربع
يا نقطة الدم
يا نشفة على توبه
هو ضحية ظروفه
ولا مكتوبه
من صغر سنه
شطح بيه الطموح .. فرماه
.. صور له يقدر
ينول أحلامه بهروبه
ح يكفنوه حين يفوق
بعيوبه .. فى ذنوبه


رباعية و ربع
باسم الشرف
يا عديمه
ركبت واتملعنت
والكدب لما طرح شجر الحرام
أدمنت
الغل كسم فى جلدك
شخص مش عارفه
والكل كاشفه
إلا أنت نكرته
واتفرعنت
وأما تمكنت
من رقب الوطن
أمعنت
----------
المعلم
من الأراجوزات المصرية
ما تفتح يا ابنى فتح
شوف مين بيكلمك
مهما تعمل مدردح
أنا برضه معلمك
التوب عليك مرحرح
والكدب مأزمك
لو كان شوكك حيجرح
نقدر ونقلمك
---------
تماحيك
كل كلاممك طحن عجين
عك عواصف فى الفناجين
حشو دماغك مالى فراغك
فيتتمسح فى المساكين
أعمى وشايف بالاثنين
حلم عدالتك .. ضاع بندالتك
من إيد خضرة وعم حسين
اتنطقت صبحت أمين
عايش تحسب .. ترسم تكتب
بالأممية قتلت ياسين
واللى ح يقرا ويسمع مين
نخلك خايخ .. صايص شايخ
ضيعت أيام الزنازين
والداء يغلب .. تكدب تحلب
تصبح من أهل الملايين
على حس الهبل .. التايهين
إشتراكية .. لكين بماهية
صنف بلاستيك
أو ملامين
نياشين للسادة .. العايبين


الفاهم
من الأراجوزات المصرية
زعيم
وراكبنا بلاشى
لإنه من سلسال تركى
سألت عنه البكباشى
اللى ورثنا على السركى
قال لى السياسة ما جايباشى
أصل انتهى اللعب الحركى
دلوقتى لعبة متا تحلاشى
غير وانت راكب يا كاوركى
-------------
شكشكات
معروف بأن البغل
خالة الحمار
والكتب لازم
يولد الإنفجار
فهمت لما ركبت
ع القمة
إيه بعدها .. يا فسل
غير لا نحدار
ما لهش حق اختيار
اللى صعوده انكسار
جايز يكون عمه
عالم من الرمل
يفرك عند لمس إيديك
وضلمة غز الظهيرة
مغيمة فى عينيك
إيه اللى يجعل بشر
تضعف قصاد الزور
وشتت النور
اللى كان يهديك
والا عميت انت
مش عايز تشوف حواليك .. ؟


كارد أساسى
لتات عجان / كل الألوان
كان عترة زمان وصبح ناسى
فى العشق لبيب / فى الهم طبيب
أبو دمع قريب عامل قاسى
على وش الزيت / زى العفاريت
يا خفيف نطيت ست كراسى
انقلب الحال / فاتعدل البال
خبرة وخيال طير وسواسى
شاطر لعيب / مكشوف ع الغيب
عداك العيب ما أنت سياسى
راكب حصانين / فى يسار ويمين
وحدا الإتنين كادر أساسى
-----------
يا من فقدت الكرامة بمساومتك على ناسك
تفيد بإية الزعامة مع انعدام إحساسك
فضلت بر السلامة – يوم فقدت حماسك
يا ميت ندامة عليك .. ليلة ما تفرغ كاسك

ثورجى
من أراجوزات مصرية
متمرس
بالحلف الثورى
صامولة ف
مسامير الجبهة
عارف منين يقبض فورى
أول ما يخلع أبوابها
ومين يبيعها يا مغاورى
ومين على حبله لعبها
ومين يهف الكأس - دورى
ويسيب .. كلابها على ديابه
-------ا
من أخر حدود الزجل
خباثــــة
صاحبى الخبيث ، مدمن التعامل مع أجهزة الأمن العربية والمحلية سألنى وهو بيمارس هوايته العلنية فى النميمة وإدمانه السرى لحواديت النسوان العوانس على رصفان قهاوى المثقفين سؤال زى شكة الابرة تحت الباط وقال وعلى وشه ابتسامته المليانه شر وحنيه :قصدك يعنى بتخاريفك دى .. إن ما فيش فرق بقى ما بين مصطفى أمين ورفعت السعيد
السؤال لدعنى ولسعنى وفور دمى، لكنى أنا ما جاوبتش على طول زى أيام شبابى الأولانية إحتميت بظروف السن ومرض السكر العصبى واكتفت بالصمت .. لكن أول ما روحت رجعت قريت كتب الثورات والانقلابات وبحوث العلماء عن الشخصيات الكاريزمية السوية واللى مش سوية .. وغصت فى كتب التاريخ القديم والحديث والسير الذاتية والخطط والاعترافات والتجليات والمذكرات .. ودورت فى القواميس والروايات وكتب جهابذة التأليف والنقد والصحافة . وخبراء إنشاء وتحرير الصحف السرية والطبقية وظروف وفاتها غير الطبيعية سواء كانت شرعية أو غير شرعية .. لحد ما تعبت وزهقت ومع ذلك .. ما لقتيش إجابة شافيه كافية للسؤال اللى شكنى بيه صديقى الخبيث خبير اللطم فى الجنازات السياسية، لكن حسيت بدمى على طرف الإبرة


خرابيش الأصدقاء
ح يجردوك يا ابن عليه .. من الوطنية
اللى دبح لاشتراكية .. طالب دمك
ضاعت سنين الزنزانة .. والقروانه
لاجيبت عيش للعيانة ولا دوا لامك
قاعد تلوم الناس وانت واكلاك عته
يا مخ نملة على جته خالك عمك
نفخت بالونات براميل .. رصيت مواويل
ورضين زعامة كل عويل بالزوق ضمك
وكلهم كبروا على ايدك .. اتمرنوا فيك
وبكل خسة داسوا عليك زودوا همك
كبروا بقت ايدهم طايلة .. بطل خايله
شيك الزعيم عدل المالية .. داهية تلمك
اللص بقى هو القاضى .. وأبوها راضى
مليان وكب على الفاضى .. فاقفل فمك
لايق على رفعت سليمان .. للقفة ودان
فاضحك على دقن الأحزان تكسر سمك
----------
عودة الوعى
قائد
نص زعيم
بلسان .. يطلع طوله
يفتى كإنه حكيم
ونصدق ما يقوله
طبع الندل لئيم
بيزوق مفعوله
يا خيبة المظاليم
حين خانهم هتفوا له
----------
قصــر ديــل
يا مصر
أنا نفسى اشكى لك
كافية ولاد يوم خلفتى
دول اللى عكروا
ماء نيلك
ودول فاتوكى
اتخلفتى
ودول نسوا
يعدلوا ميلك
ودول باعوك
اتسلفتى
وأنا اللى حافظ
مواويلك
كل اللى حيلتى
اشتم
وافتى